اهلا بكم اعزائى واصدقائى بمدرسه عقبه بن نافع مرحبا


    شعر فى حب مصر

    شاطر
    avatar
    Nour Allah

    عدد المساهمات : 132
    نقاط : 261
    تاريخ التسجيل : 10/02/2011
    العمر : 22
    الموقع : http://www.facebook.com/home.php

    شعر فى حب مصر

    مُساهمة  Nour Allah في السبت فبراير 12, 2011 12:17 am



    شعر فى حب مصر

    بَحِبِّكْ يا مصرْ ..

    وبعشقْ ترابكْ .

    وألِفْ المداينْ ..

    وأرْجعْ لبابِكْ .

    وأحِسْ بكيانى ..

    وكرامتى فْ رحابِكْ .

    يقولوا فقيره ..

    يقولوا أسيره ..

    بشوفِكْ أميره ..

    وأحبِّكْ يا مصرْ .



    بحبِّكْ ملايه .. ومنديلْ بِقُويا .

    مقالبْ من أختى .. وغتَاته مْنْ أخويا .

    ودعوه مِنْ أمى .. تنسينى همِّى ..

    وحِكْمَه مْنْ أبويا.

    وأحبِّكْ صبيِّه .. على البحرْ جايَّه ..

    فى ساعةْ عصَارى .

    ونسمه قُبَالْها .. تطيَّرْ فى شالْها ..

    تبَيِّنْ جمالها .. وتِرجعْ تدارى .

    وأحبِّكْ مراكبْ .. تعدِّى إللِّى راكبْ ..

    لبرْ الأمانْ .

    يدوبْ جوَّا نيلكْ .. ويعطشْ يجيلكْ ..

    يقوللِّكْ كمانْ .



    وأقابلِكْ ببُوسه .. فى زفِّةْ عروسه ..

    ولَمَّه فى بيتنا ..

    مع ولادْ حارتْنا ..

    تدُقْ المزاهرْ .. ترُدْ المزامرْ ..

    تزَغْردْ جارتْنا .

    نهلِّلْ .. نغنى ..

    وحلمْ التمنِّى ..

    ينورْ ليليتنا .

    وأحبِّك زياره لبيتْ عمْ سيدْ ..

    ده أصله فقير مِشْ حيقْدرْ يعَيِّدْ ..

    نعَيِّدْ عليه .. نفرَّحْ عنِيهْ ..

    ويدعيلْنا دعوه بمليونْ جنيه .



    فى أرضِكْ يحِسْ الغريبْ إنُّه مصرى ..

    وإحنا الأجانبْ .

    ويلْقَى الرعايهْ .. ويلْقَى الحمايهْ ..

    على كلْ جانبْ .

    ويمشى ف ربوعِكْ .. ويشبعْ بجوعِكْ ..

    ويعملْ مصايبْ .

    ويرحلْ وينسى .. جِميلِكْ ويقْسَى ..

    ويطْلَعْ يعايبْ .

    ويرْجعْ تسامْحى .. يا ساكنه فْ ملامحى ..

    يا سِتْ الحبايبْ .



    ولادِكْ بَنُوكى .. بروحْهُمْ فَدُوكى ..

    ويِشْهدْ عليهمْ ترابكْ فى سينا .

    ومنهُمْ با عوكى .. عشانْ الشِيروكِى ..

    وفيللَّا فْ مارينا .

    يعيشوا فى خيرِكْ .. ويدُّوهْ لغيركْ ..

    ولادْ اللَّذِينا .

    ولوْ جارْ زمانْهمْ .. يعودُوا لْمكانهمْ ..

    يلاقوا السَكينَهْ .

    وتِنْسِى جحودْهمْ .. وتبكى عليهمْ ..

    عنيكى الحزينهْ .



    فى أرضكْ سرَحْتْ .. فشَلْتْ ونَجَحْتْ ..

    وعشْتْ بْبساطَهْ .

    صاحِبتْ الحمَامْ .. ونِمْتْ فْ سلامْ ..

    ولوَْ عَ البلاطهْ .

    تِغَيَّرْ فى شَكلى ..همومى ومشَاكْلى ..

    لكِنْ روحى لأْ .

    أعَبَّرْ بغنْوهْ .. وأقولْ نُكتهْ حلوهْ ..

    لكِنْ يأسْ لأْ .

    ما طيقْشْ الغَتاتهْ ..

    وقلبى المسالمْ ما يعرفْ شّماتهْ ..

    وأقولْ بالتلاتهْ ..

    بحبِّكْ .. بحبِّكْ .. بحبِّكْ .. يا مصرْ
    avatar
    محمود دباح (حودة)
    Admin

    عدد المساهمات : 110
    نقاط : 195
    تاريخ التسجيل : 10/02/2011
    العمر : 21
    الموقع : http://3kobabnnaf3.forumegypt.net

    رد: شعر فى حب مصر

    مُساهمة  محمود دباح (حودة) في الثلاثاء فبراير 15, 2011 3:45 am

    ممتاز وتسلم ايدك

    مع تحياتى

    محمود دباح king
    avatar
    Nour Allah

    عدد المساهمات : 132
    نقاط : 261
    تاريخ التسجيل : 10/02/2011
    العمر : 22
    الموقع : http://www.facebook.com/home.php

    رد: شعر فى حب مصر

    مُساهمة  Nour Allah في الخميس فبراير 17, 2011 12:34 am

    شكراا خالص ليك
    اسعدنى مرورك الكريم
    avatar
    محمود دباح (حودة)
    Admin

    عدد المساهمات : 110
    نقاط : 195
    تاريخ التسجيل : 10/02/2011
    العمر : 21
    الموقع : http://3kobabnnaf3.forumegypt.net

    رد: شعر فى حب مصر

    مُساهمة  محمود دباح (حودة) في الخميس فبراير 17, 2011 1:49 am

    الله يخليكى



    مع تحياتى

    farao محمود دباحking

      الوقت/التاريخ الآن هو الإثنين يونيو 26, 2017 12:37 am